Det nærmar seg...

26 minusgrader i Bagn. Rapportane seier det er -34 i Vågå. For to dagar sidan kom eg heim frå Gran Canaria, der det var 26 grader. Eg skulle berre ha blitt der. Eg hatar kulde! Eg kunne forresten skrivi eit langt innlegg om Gran Canaria. Du har verkeleg ikkje vore i Syden før du har vore der. Det levde opp til forventningane, og meir enn som så! :)

I dag skal eg hente min søte lille nye bil. Ein svart toyota Rav4 med spoiler og stigbrett. Bil er ein dyr fornøyelse. Berre i forsikring og lån vil det koste meg fire tusen kroner i månaden. Fyttirakkern. Eg er ung og enslig, med over to millioner i gjeld. Ikkje bra. Ikkje bra. Mitt forsikringsselskap TrygVesta tok forresten kaka. Dei skulle ha 30 000 i året for å forsikre bilen min. Så mykje for å allereie vere kunde der (altså, så blir ikkje bilen min forsikra der).

I morgon reiser eg til Vågå. Huff som eg gruer meg. Til å reise altså. Til å flytte. Til å måtte vere ute i over tretti minus. Og til eit kaldt husvære utan internett og tv-signal. Ikkje har eg mann som kan hjelpe meg med det heller (eg skal ærlig innrømme at når det gjeldt praktiske ting, så er eg ein dårleg feminist).

Eg må ha rosa rattpels til nye bilen min. Så no brukar eg tida til å finne ut kor eg kan få kjøpt det. Rosa rattpels er min måte å vise at eg er ein moderne feminist. Som eig min eigen bil. Og min eigen leilighet. Og mitt eige lån. Og som er avhengig av godvilje frå banken.

Eg debuterer i ny jobb med å ha møte med Fylkesmannen. Det er kva eg skal bruke fyrste arbeidsdag til. Prat om å bli kasta ut i det. Men årets kommuneprofil, Rune Øygard, skal sjølvsagt bli med, så vi får tru det går bra.

Men som eg gler meg til å komme i gang no. Prosjektet er ambisiøst. Prosjektet er utypisk bygde-noreg. Men er det ei kommune som kan klare å lage ei knakande god skule, og utvikle sin eigen skulemodell, så er det Vågå. Så får vi sjå om vi etter kvart kan kalle skulen Noregs beste. :)