Gå til hovedinnhold

Kettlebellhelvete

Kettlebell er det store her i Høyanger om dagen. "Alle" trenar kettlebell kvar onsdag klokka 21-22 i Høyangerhallen. Hadde eg visst at dette var noko "alle gjorde" ville eg tenkt meg om to gonger før eg vart overtalt av ein kollega til å bli med tidlegare denne veka.

Eg burde skjønt det når eg skulle ned på "Sporten" for å kjøpe meg kettlebell. Eg stod og glana på desse slags østeuropeiske monstra då det kom to damer som begge greip tak i kvar sin rosa kettlebell og slengte den opp på disken. Dei spør meg: "Jasså; du skal vere med på kettlebelltreningane du også?". Eg visste ikkje kva eg skulle vere med på, men skjønte fort at eg kan gløyme å føle meg veldig alternativ desse onsdagane.

Mannen på Sporten meinte at også eg skulle ha ein rosa kettlebell. Åtte kilo. Eg bar han (kettlebellen altså) heim til Dale i sekken. Løfta han ut då eg kom heim, sette han på golvet og lurte på korleis eg i det heile take skulle klare å gjere noko som helst med den tunge kula.

Onsdagkveld kjem vi inn i Høyangerhallen slik omtrent rett før øvinga startar. Det er smekkfullt. Vi pratar om femti-seksti damer som står med kvar si kule - klare til å begynne. Vi finn ein plass heilt bakerst. Fleire hundre meter frå instruktøren. Vi fniser. Vi pratar tull. Lurer på korleis i alle dagar dette skal gå. Dei to eg er der i lag med er også der for fyrste gong.

Vi oppdagar til vårt store sjokk at vi skal bli filma. Til Vestlandsrevyen. Jippi. Ikkje nok med at valkene tyt og at grevinnehenget synast alt for godt. Vi skal bli sendt på tv i tillegg.

Vi gløymer snart kamera. Det gjer vondt. Det gjer vondare og vondare. Kettlebell'en er for tung. Eg føler eg ikkje får til øvingane rett. Eg blir blå på armane. Liten pause etter kvart. Det har gått 15 minutt. 45 minutt att. Vi startar på att. Eg ser meg rundt. Alle ser uforskamma spreke ut. Eg vil ta ein pause, men kan liksom ikkje det. Vil ikkje vere dårlegast. Vi blir ferdige til slutt. Alt gjer vondt. Til og med kvileøvinga ("swing") som vi gjer heile tida gjer vondt - i armane. Og dette er ei øving du skal bruke beina på. Jaja. Vi får til slutt pressa oss gjennom heile økta, og det er slett ikkje så verst når vi fyrst blir ferdige.

Om eg kjem til å gå neste veke? Eg må jo det. Eg har folk som tvingar meg. Eg må berre trene mykje styrke mellom kvar onsdag slik at eg kan kome meg opp på eit nivå der eg kan bruke ein åttekilos kettlebell rett. Godt råd; er du nybegynnar, prøv å få tak i ein av desse på seks kilo!

Og her kan du lese og og sjå innslaget frå Vestlandsrevyen. Du kan finne meg ein liten augenblikk omtrent 1:03 ut i klippet. Heilt oppe i venstre hjørne med lille topp (og fortsatt litt for mange valker).

Kommentarer

Populære innlegg fra denne bloggen

Korleis få trent når du er åleine med ein 1-åring heile dagen?

Dei siste månadene har trening vore min ultimate form for åleinetid og måte å hente overskot på. Anten det har vore i form av å springe ut ein kort tur, gjere nokre øvingar med kettlebell'n på gardsplassen eller stikke på treningsrommet i Heggenes. I Oslo har eg meldt meg inn hjå Sats Elixia, og eg har funne ut at eg verkeleg elskar å vere med på gruppetrening (som eg ikkje skjønner kvifor eg ikkje gjorde før når eg hadde masse tid?), og for ikkje å prate om dampbad eller badstue etterpå. Eller ein laaang dusj!


Den veka her er eg imidlertid åleine med Sigmund i Oslo for å ha vakt på jobben. Sidan eg blir sur og lei om eg ikkje får trent og får den åleinetida, var min store bekymring for korleis dette skulle gå denne veka. Korleis får dei som har eineomsorg for ungar eigentleg trent?


Eg har barnepass inkludert i Sats-medlemskapet mitt, men eg har ikkje hatt hjarte til å plassere han der den veka her, sidan eg har vore oppteken av at dette også skal bli "Hanne og Sigmund sin dr…

Min onde bebi og meg

Etter å ha lese diverse babynettstader og mammanettstader dagleg dei siste månadene, har eg lært veldig mykje om kva andre mødre har som utfordringar.

Eg har slik skjønt at eit vanleg spørsmål nybakte mødre får, er dette: "Er han snill då?". Eg har også lese meg til at dette er eit spørsmål som provoserer mange, sidan det faktisk er vanskeleg å definere om ein bitteliten bebi er snill eller slem.

Difor burde eg vore førebudd då eg sjølv fekk dette spørsmålet. Det var eg imidlertid ikkje. Spørsmålet kom overraskande, og eg burde ha lagd meg nokre artige svar eg kunne brukt og som kunne stoppa kjeften på grand-tantene (det er alltid tanter!) slik at dei spurte litt lurare neste gong dei lurer på noko om bebien.

Det klarte eg ikkje, og eg endte (som vanleg) opp med å svare noko dust. 
Grand-tante: Er han snill då?
Hanne: "Det er vel litt vanskeleg å definere om ein bebi er snill eller slem allereie no"
Grand-tante: Eg meiner, skrik han mykje?
Hanne: Han skrik når han er sv…

Mammaen din er så glad i deg!

Plutseleg er eg blitt eitt av desse irriterande menneska som omtaler meg sjølv i tredjeperson. Det skjer sjølvsagt berre i samtale med vesle bebien min, men sidan det stort sett er berre han eg pratar med om dagen, skjer dette heller ofte.

- Mammaen din skal berre ein liten tur på do, skjønner du
Slik startar dagen når eg må forlate Sigmund åleine i senga vaken og nesten på gråten om morgonen. Eg må fortelje han at eg snart kjem tilbake for å hente han, men at blæra til mammaen hans ikkje er som før og at eg difor må på do.
- Du skjønner, Sigmund, at mammaen din er ikkje så flink til å gjere knipeøvingar

Vi går inn til stellebordet, og der fortsett det: "No skal mammaen din berre finne fram ei bleie, skjønner du. Mammaen din er så glad i deg. Du er sååååå søt".

I løpet av ein dag har eg tatt meg sjølv i å si dette:
- Mammaen din er så glad i deg (dette seier eg ofte)
- Mammaen din elskar deg
- Mammaen din må berre ta på deg lue, skjønner du - fordi det står i Mammabøkene at små bebi…