Gå til hovedinnhold

Bieberhysterikarane


Nei, eg pratar ikkje om 13 år gamle jenter som er håplaust forelska i Justin Bieber. Eg pratar om vaksne folk som går fullstendig bananas for at nokre skular i Noreg bestemte seg for å flytte tentamen på grunn av Justin Bieber-konsertane.  Desse Bieberhysterikarane skrik ut om at dette kan sende ut signal om at Justin Bieber er viktigare enn skulen. Trøste og bære!

Av den generelle læreplanen følgjer det at vi som lærarar både skal stimulere, utnytte og danne motvekt til den kulturen ungdom skaper sjølve.

Det er ikkje berre lett å vite kva dette betyr, men vi kan i alle fall vere einige om at det er viktig for skulen å vere oppdatert på det som skjer utanfor klasserommet. I tillegg skal vi faktisk også bruke ungdomskultur når vi legg opp undervisinga vår.

Justin Bieber er i høgste grad ungdomskultur. Justin Bieber er eit fenomen. Han er ei verdsstjerne. Ungdom ser opp til han. Han viser at det er mogleg å bli verdsstjerne uansett kor du kjem frå. Frå ein småby i Canada vart han oppdaga via YouTube (dette har eg lært av elevane mine).

For ungdom handlar Justin Bieber om så mykje meir enn ein pen gut som kan danse og synge. For mange er Justin Bieber symbolet på at du kan bli det du vil i livet uansett kor du kjem frå.

Som engelsklærar blir eg glad når eg ferskar elevane mine i å skrive bursdagskort til Justin Bieber i ein time. Eg må sjølvsagt be dei legge det bort for å gjere det dei skal, men eg hjelper gladeleg til med rettskriving i friminuttet.

Som norsklærar blir eg glad når elevane mine etter ein ferie fortel meg at dei har lese ei bok om Justin Bieber. Eg blir glad for alt som får elevane til å lese meir. Om det er Justin Bieber, fotball eller ”En pingles dagbok” spelar mindre rolle.

Eg trur ikkje eg undergrev min lærarkompetanse ved å seie at elevane faktisk kan lære utan at eg har bestemt at dei skal det.  Faktisk vil eg påstå at elevane lærer meir viss det er noko dei sjølve ønskjer å lære om.

Eg trur elevane lærer meir av å reise på Justin Bieber-konsert enn å vere på skulen denne dagen. Det har eg også fortald elevane mine som skal i vegen.
Det betyr ikkje at eg meiner skulen ikkje er viktig. Det betyr heller ikkje at eg meiner vi burde byta ut alle skuledagar med Justin Bieber-konsertar.

Viss elevane mine etter ein vanleg skuledag får spørsmål om kva dei lærte i dag, vil mange slite med å kome med fleire enn tre punkt. Truleg hugsar dei ikkje alle fag dei har hatt ein gong.

Spør eg dei same elevane om kva dei lærte av å vere på Justin Bieber-konsert, vil dei truleg kome med mange punkt. Dei vil hugse spenninga. Forventingane. Bråket. Hyla. Songane. Kva han sa. Luktene. Smakane. Synsinntrykka. Dei brukar alle sansane sine i ei slik oppleving.

Når folk skrik ut at det vitnar om liten respekt for skulen at ein kommune valde å flytte tentamenane sine på grunn av Justin Bieber, tenkjer eg at dei syner liten respekt for den jobben vi gjer i skulen. Dei syner manglande respekt for den fridom skulane må ha til å legge opp kvardagen og årshjulet slik dei ønskjer. Gjerne i samråd med elevane sjølve.

Eg ønskjer alle som skal av garde til Justin Bieber-konsert i neste veke god tur. Eg er heilt sikker på at de både får ei oppleving og lærdom for livet.

Og til mine elevar; den dagen Take That skal ha reunion-konsert i Oslo midt i veka, kjem også eg til å søkje meg permisjon for å reise på konsert!


Dette innlegget var også å lese i Nationen 12.april 2013

Kommentarer

Populære innlegg fra denne bloggen

Korleis få trent når du er åleine med ein 1-åring heile dagen?

Dei siste månadene har trening vore min ultimate form for åleinetid og måte å hente overskot på. Anten det har vore i form av å springe ut ein kort tur, gjere nokre øvingar med kettlebell'n på gardsplassen eller stikke på treningsrommet i Heggenes. I Oslo har eg meldt meg inn hjå Sats Elixia, og eg har funne ut at eg verkeleg elskar å vere med på gruppetrening (som eg ikkje skjønner kvifor eg ikkje gjorde før når eg hadde masse tid?), og for ikkje å prate om dampbad eller badstue etterpå. Eller ein laaang dusj!


Den veka her er eg imidlertid åleine med Sigmund i Oslo for å ha vakt på jobben. Sidan eg blir sur og lei om eg ikkje får trent og får den åleinetida, var min store bekymring for korleis dette skulle gå denne veka. Korleis får dei som har eineomsorg for ungar eigentleg trent?


Eg har barnepass inkludert i Sats-medlemskapet mitt, men eg har ikkje hatt hjarte til å plassere han der den veka her, sidan eg har vore oppteken av at dette også skal bli "Hanne og Sigmund sin dr…

Too good to go

Denne veka har eg med Sigmund (snart 1 år) på jobb i Oslo. Slik må det nesten bli når eg har vakt, men ikkje barnevakt. Sigmund storkosar seg med å klatre opp trappa til kommunikasjonsavdelinga, mens eg spring etter. I dag fekk eg lese nokre aviser mens Sigmund såg på Pudding-tv.

Poenget er at det er svært lite å få gjort av jobbting før etter Sigmund har lagt seg klokka 18. Difor tenkte eg at eg skulle gjere halvveis jobbrelaterte ting som er mogleg å kombinere med å underhalde ein svært aktiv liten krabat. I dag bestemte eg meg difor for å teste appen "Too good to go". For de som ikkje veit kva dette er, så er det altså ein teneste som formidlar kontakt til bakeri, restauranter og hotell, der du kan få kjøpt overskotsmat til ein billig penge. Anten frå det som er att i bakeriutsalet eller som er att etter hotellfrukosten.

Fyrste tips; ver tidleg på om morgonen. "Pakkene" blir fort utseld (spesielt hjå bakeria), så du bør legge inn bestillinga di tidleg om morgo…

Mammaen din er så glad i deg!

Plutseleg er eg blitt eitt av desse irriterande menneska som omtaler meg sjølv i tredjeperson. Det skjer sjølvsagt berre i samtale med vesle bebien min, men sidan det stort sett er berre han eg pratar med om dagen, skjer dette heller ofte.

- Mammaen din skal berre ein liten tur på do, skjønner du
Slik startar dagen når eg må forlate Sigmund åleine i senga vaken og nesten på gråten om morgonen. Eg må fortelje han at eg snart kjem tilbake for å hente han, men at blæra til mammaen hans ikkje er som før og at eg difor må på do.
- Du skjønner, Sigmund, at mammaen din er ikkje så flink til å gjere knipeøvingar

Vi går inn til stellebordet, og der fortsett det: "No skal mammaen din berre finne fram ei bleie, skjønner du. Mammaen din er så glad i deg. Du er sååååå søt".

I løpet av ein dag har eg tatt meg sjølv i å si dette:
- Mammaen din er så glad i deg (dette seier eg ofte)
- Mammaen din elskar deg
- Mammaen din må berre ta på deg lue, skjønner du - fordi det står i Mammabøkene at små bebi…