Gå til hovedinnhold

Fem nyansar av Grey

Eg er redd for å gå glipp av det som skjer i verda. Det er grunnen til at eg prøver å få med meg politisk kvarter kvar morgon og grunnen til at eg bestilte billettar til "Fifty shades of grey" og var på kino på laurdag.

Nokon vil sikkert påstå eg heller burde lese bøkene. Det har eg ikkje gjort. Men ståket rundt filmen har gjort at eg er blitt ekstremt nysgjerrig. Javisst diskuterte mine kollegaer i min førre jobb bøkene (det gjer dei ikkje i Landbruks- og matdepartementet, men eg har fått avslørt at det er folk her som har lese bøkene), men det var ikkje nok til at eg valde å lese dei.

Men med filmen har det tatt av. Og som den romantikar eg er, bestilte eg billettar til filmen på sjølvaste Valentinsdagen, og tvinga kjærasten min til å bli med. Eg såg for meg at eg måtte sitte i salen med skjerfet framfor ansiktet, og berre vere flau. Så feil kunne eg ta. Dette var ikkje flaut, men det var ganske kjedeleg.

I løpet av filmen sjekka eg facebook tre gonger. Eg var meir nysgjerrig på reaksjonen på bilete eg hadde lagt ut av kinobillettane enn eg var nysgjerrig på kva som skjedde i filmen.


Nokon kommenterte fyrste rad. De trur meg sikkert ikkje, men det var einaste som var ledig då eg bestilte. Dessutan; siste rad er meir suspekt. 


Kva i alle dagar er det kvinnegruppa Ottar protesterer så på? Viss folk ikkje skjønner at dette er fiksjon, skjønner dei ikkje at noko er fiksjon! Livet mitt er blitt meir påverka av filmen "Mumien" enn denne filmen.

For det fyrste: Mr. Grey er så utruleg kjedeleg at eg trur ikkje det finst makan i heile verda.

For det andre: Det er umogleg å bli så rik av å jobbe så lite. Aldri i livet om nokon som skal vere så vellukka business-mann har tid til å bruke så mykje tid på nett-chatting.

For det tredje: Aldri verda at ingen av dei 15 tidlegare damene han har skrive kontrakt med ikkje ville brote kontrakta og sladra om det som skjer. Aldri! Ikkje at eg kjenner til amerikansk rettsvesen, men den kontrakta er neppe bindande i ein domstol.

For det fjerde: Det finst ikkje ein romanse i verda med så dårleg symbolbruk og med så dårlege dialogar.

Eg kan forresten vere einig i ein ting. Det er at Mr. Grey kan ha stalker-tendensar. Han er heller ingen fyr som er verdt å trakte etter. Og han har openbart issues som gjer at han er heller usympatisk.

Feminisme for meg er ikkje å oppfordre til boikott av ein dustefilm. Feminisme for meg er vel heller at jenter skal ha vett til å unngå kjedelege, platte og idiotiske fyrar som rollefiguren Mr. Grey.

Eg har såpass tiltru til at jenter som ser denne filmen klarer å skille film frå verkelegheit.

Akkurat som eg skjønte at ypperstepresten Imhotep i filmen "Mumien" heller ikkje var ein mann eg burde prøve å finne.

Kommentarer

Populære innlegg fra denne bloggen

Korleis få trent når du er åleine med ein 1-åring heile dagen?

Dei siste månadene har trening vore min ultimate form for åleinetid og måte å hente overskot på. Anten det har vore i form av å springe ut ein kort tur, gjere nokre øvingar med kettlebell'n på gardsplassen eller stikke på treningsrommet i Heggenes. I Oslo har eg meldt meg inn hjå Sats Elixia, og eg har funne ut at eg verkeleg elskar å vere med på gruppetrening (som eg ikkje skjønner kvifor eg ikkje gjorde før når eg hadde masse tid?), og for ikkje å prate om dampbad eller badstue etterpå. Eller ein laaang dusj!


Den veka her er eg imidlertid åleine med Sigmund i Oslo for å ha vakt på jobben. Sidan eg blir sur og lei om eg ikkje får trent og får den åleinetida, var min store bekymring for korleis dette skulle gå denne veka. Korleis får dei som har eineomsorg for ungar eigentleg trent?


Eg har barnepass inkludert i Sats-medlemskapet mitt, men eg har ikkje hatt hjarte til å plassere han der den veka her, sidan eg har vore oppteken av at dette også skal bli "Hanne og Sigmund sin dr…

Too good to go

Denne veka har eg med Sigmund (snart 1 år) på jobb i Oslo. Slik må det nesten bli når eg har vakt, men ikkje barnevakt. Sigmund storkosar seg med å klatre opp trappa til kommunikasjonsavdelinga, mens eg spring etter. I dag fekk eg lese nokre aviser mens Sigmund såg på Pudding-tv.

Poenget er at det er svært lite å få gjort av jobbting før etter Sigmund har lagt seg klokka 18. Difor tenkte eg at eg skulle gjere halvveis jobbrelaterte ting som er mogleg å kombinere med å underhalde ein svært aktiv liten krabat. I dag bestemte eg meg difor for å teste appen "Too good to go". For de som ikkje veit kva dette er, så er det altså ein teneste som formidlar kontakt til bakeri, restauranter og hotell, der du kan få kjøpt overskotsmat til ein billig penge. Anten frå det som er att i bakeriutsalet eller som er att etter hotellfrukosten.

Fyrste tips; ver tidleg på om morgonen. "Pakkene" blir fort utseld (spesielt hjå bakeria), så du bør legge inn bestillinga di tidleg om morgo…

Vurdering av årets finale i Melodi Grand Prix

Seinare enn det brukar, men finalen i årets MGP kom likevel brått på. Fire timar på buss laurdagsformiddag gjev meg likevel tid til å trille terning. Her er poenga frå Hanne-juryen i år.

Aleksander Walmann - Talk to the hand Med fare for å virke som ei gammal sur dame, er dette slik nymotens musikk eg ikkje skjønner meg på. Dette er så flatt og så kjedeleg. Mambojambo er kanskje kult å synge for kidza, men ikkje for meg. 
Terningkast: 2 

Charla K - Stop the music Dette er fint. Faktisk kjempefint dess meir du høyrer på songen. Og det verkar så proft og så gjennomført! I MGP likar eg vanlegvis glitter og mas, men dette må då vere kveldens favoritt?
Terningkast: 5 
Alejandro Fuentes - Tengo Otra Eg digger jo latino og denne songen er ein sang som hadde vore på spelelista mi når eg jogger, men utan at eg ville gjeve songen så mykje oppmerksemd. Det er halvpent, men ikkje så mykje meir enn det. 
Terningkast: 3
Ida Maria - Scandilove Hurra! Endeleg ein song som får meg i godt humør. Ved fy…