Gå til hovedinnhold

Går verda snart tom for mat?

I går vart det altså servert mat laga av og på insekter i Mathallen i Oslo. Dette blir jo ikkje gjort berre for moro skuld, men det handlar om at det er eit heitt tema kva vi skal leve av i åra framover. Har vi nok mat til å brødfø ei stadig veksande folkemengde, er spørsmålet mange stiller seg.

Det er litt science fiction-aktig å ete insekt. Eg ser for meg ein katastrofefilm der alt vi kan ete er insekt, og for å klare oss må menneska starte med insektsoppdrett. Gomle grashoppe dagen lang. Til og med presidenten i USA må gomle grashoppe.

Vi har stadig produsert meir mat i verda i takt med at folkemengda har auka, og eg føler meg sikker på at vi kjem til å gjere det i tida framover også. Eg er utviklingsoptimist, og har vore det sidan eg vart oppslukt av teoriane til Ester Boserup då eg studerte utviklingsgeografi ein gong for lenge sidan.

Vi produserer nok mat i verda til å brødfø alle folk i verda når det kjem til kilokalorier. Hovudproblemet er at maten ikkje er er fordelt godt nok. Slike som meg et for mykje og kastar for mykje, mens i andre deler av verda har dei ikkje nok mat. Stadig fleire menneske blir riktignok løfta ut av fattigdom og svelt, men framleis svelter for mange i verda.

Kva gjer vi så med dette? Skal vi allereie no starte å ete grashopper eller skal vi skrive leserbrev og arrangere konferanser?

Eg er ikkje glad i store og diffuse tankar om kva vi skal gjere globalt. Det er opplagt behov for global handling både med tanke på landbruk og klima (ofte i kombinasjon), og det viktigaste her er mellom anna forsking og gode mekanismer for å utvikle og dele det plantegenetiske mangfaldet vårt. Eg trur også det er lurt med forsking og utvikling på korleis vi skal ta i bruk nye ressursar, slik som til dømes insekt. Eller gro kjøt i laboratorium for den saks skuld (jada, eg rynkar på nasen eg også). I tillegg til at det viktigaste sjølvsagt er korleis få meir mat ut av dei ressursane vi brukar i dag. For å si det enkelt: Korleis få meir korn ut av same areal?

Det eg trur mest på vil likevel alltid vere enkeltmenneske. Eg trur på den gamle leveregelen om "å tenkje globalt og handle lokalt". Vi må begynne med oss sjølve for at vi skal endre verda. Eg kan prate fine tankar om å redusere matsvinnet i verda, vi kan sikkert til og med innføre lover, avgifter og regler (sjølv om eg ikkje er tilhengjar av det). Det hjelper likevel lite med nye lover om folk ikkje skjønner problemet og ønskjer å gjere noko med det. Makta til fem millionar menneske er mykje større enn 169 politikarar.

Bunnpris har i enkelte matbutikkar innført ein eigen seksjon med "snål frukt og grønt" til redusert pris. Dette gjer dei jo ikkje berre for å vere snille og ta samfunnsansvar, men sjølvsagt også fordi dei utnytter ein trend. Trenden om at folk ønskjer å vere miljømedvitne, dei tek oppgjør mot sløseriet, mot overfloden og ønskjer å gjere noko som er rett. Vi menneske let oss opprøre over fint brukbar mat som blir kasta fordi det ikkje er "pent nok".

Dei snåle grønsakene eg kjøpte er eigentleg ikkje så snåle.

Vi menneske tek avstand frå skjønnhetsideal og det perfekte.Vi ser det på sosiale medium når folk legg ut bilete av seg sjølv uretusjert og absolutt ikkje perfekt. Ingen bilete får fleire "likes" enn desse bileta (kanskje bortsett frå bilete av blide folk på fjelltur).

No er vi også i ferd med "å like" dei grønsakene og frukten som ikkje når opp i den daglege skjønnhetskonkurransa i matbutikkane. Folk ønskjer også at dei ikkje-perfekte grønsakene skal kome til nytte. Difor har eg tru på at Bunnpris sitt initiativ vil funke.

For meg funkar konseptet opplagt. Heldigvis bur eg ikkje langt unna ein av Bunnpris-butikkane som har dette tilbodet her i Oslo. Og dit skal eg fleire gonger. Eg trur også både rike, fattige og studentar vil gjere det same som meg. Kven vil vel ikkje vere miljømedviten og ta samfunnsansvar samstundes som vi sparar pengar?

I tillegg til å handle snåle grønsaker, jobbar eg hardt for at matavfallsposen ikkje skal bli kasta så ofte. Det fungerer i mitt liv, og det vart sving på sakene då det gjekk opp for meg at det gjekk an å fryse ned både urter, matrester, grønsaker og frukt (opplagt lurare enn å tenkje: "det et eg jo i morgon, så eg sett det i kjøleskapet"). No er frysaren full og matavfallsposen tom. Pengar sparar eg også.

Men korleis vart det med desse grashoppene då?

Eg satsar på det kortreiste, eg. Lauk frå Noreg og Bunnpris er å foretrekke framfor grashopper frå Nederland. Og så skal eg love dykk ein ting til; det kjem nok ikkje til å bli innført ei støtteordning over jordbruksavtala til insektsoppdrett.


Kommentarer

Populære innlegg fra denne bloggen

Korleis få trent når du er åleine med ein 1-åring heile dagen?

Dei siste månadene har trening vore min ultimate form for åleinetid og måte å hente overskot på. Anten det har vore i form av å springe ut ein kort tur, gjere nokre øvingar med kettlebell'n på gardsplassen eller stikke på treningsrommet i Heggenes. I Oslo har eg meldt meg inn hjå Sats Elixia, og eg har funne ut at eg verkeleg elskar å vere med på gruppetrening (som eg ikkje skjønner kvifor eg ikkje gjorde før når eg hadde masse tid?), og for ikkje å prate om dampbad eller badstue etterpå. Eller ein laaang dusj!


Den veka her er eg imidlertid åleine med Sigmund i Oslo for å ha vakt på jobben. Sidan eg blir sur og lei om eg ikkje får trent og får den åleinetida, var min store bekymring for korleis dette skulle gå denne veka. Korleis får dei som har eineomsorg for ungar eigentleg trent?


Eg har barnepass inkludert i Sats-medlemskapet mitt, men eg har ikkje hatt hjarte til å plassere han der den veka her, sidan eg har vore oppteken av at dette også skal bli "Hanne og Sigmund sin dr…

Too good to go

Denne veka har eg med Sigmund (snart 1 år) på jobb i Oslo. Slik må det nesten bli når eg har vakt, men ikkje barnevakt. Sigmund storkosar seg med å klatre opp trappa til kommunikasjonsavdelinga, mens eg spring etter. I dag fekk eg lese nokre aviser mens Sigmund såg på Pudding-tv.

Poenget er at det er svært lite å få gjort av jobbting før etter Sigmund har lagt seg klokka 18. Difor tenkte eg at eg skulle gjere halvveis jobbrelaterte ting som er mogleg å kombinere med å underhalde ein svært aktiv liten krabat. I dag bestemte eg meg difor for å teste appen "Too good to go". For de som ikkje veit kva dette er, så er det altså ein teneste som formidlar kontakt til bakeri, restauranter og hotell, der du kan få kjøpt overskotsmat til ein billig penge. Anten frå det som er att i bakeriutsalet eller som er att etter hotellfrukosten.

Fyrste tips; ver tidleg på om morgonen. "Pakkene" blir fort utseld (spesielt hjå bakeria), så du bør legge inn bestillinga di tidleg om morgo…

Vurdering av årets finale i Melodi Grand Prix

Seinare enn det brukar, men finalen i årets MGP kom likevel brått på. Fire timar på buss laurdagsformiddag gjev meg likevel tid til å trille terning. Her er poenga frå Hanne-juryen i år.

Aleksander Walmann - Talk to the hand Med fare for å virke som ei gammal sur dame, er dette slik nymotens musikk eg ikkje skjønner meg på. Dette er så flatt og så kjedeleg. Mambojambo er kanskje kult å synge for kidza, men ikkje for meg. 
Terningkast: 2 

Charla K - Stop the music Dette er fint. Faktisk kjempefint dess meir du høyrer på songen. Og det verkar så proft og så gjennomført! I MGP likar eg vanlegvis glitter og mas, men dette må då vere kveldens favoritt?
Terningkast: 5 
Alejandro Fuentes - Tengo Otra Eg digger jo latino og denne songen er ein sang som hadde vore på spelelista mi når eg jogger, men utan at eg ville gjeve songen så mykje oppmerksemd. Det er halvpent, men ikkje så mykje meir enn det. 
Terningkast: 3
Ida Maria - Scandilove Hurra! Endeleg ein song som får meg i godt humør. Ved fy…