Gå til hovedinnhold

Straks klar for ferie!

Eg har hatt det utruleg triveleg på jobb i Landbruks- og matdepartementet i juli. Eg har til og med fått oppleve litt korleis det er å ha kollegaer. Som politikar i eit departement elles i året, føler du deg til tider litt åleine. Men i sommar føler eg at eg har fått vore ein god kollega til dei i departementet. Skravla, prata tull, prata fag, hatt felles lunsjer, og vi har til og med vore ute og drukke vin i lag etter jobb (slå den!).

Livet mitt er elles vanlegvis ganske kjedeleg. Eg er på Beitostølen i helgene (stort sett) og då brukar eg tida i lag med han eg elskar høgast på denne jord. Kjærasten min, altså. I vekene er eg i Oslo utan kjærast (eg hatar det!). Då er eg berre på jobb. Så går eg heim i den stusselege pendlarleiligheten min utpå kvelden ein gong, og ser ofte litt på tv. Så legg eg meg. Så står eg opp tidleg dagen etterpå. Og slik går no dagane. I tillegg er det sjølvsagt ein del reising rundt omkring i landet (eller utlandet ein sjeldan gong) - i perioder meir enn andre gonger.

I sommar har eg derimot fått oppleve korleis det er å ha eit liv (utanom jobb og kjærast). Eg jobbar nemlig "normale dagar". Det er heilt skjønt. Og litt rart. Men frustrerande sidan eg ikkje alltid har visst kva eg skal gjere etter eg ferdig på jobb. Eg kan ikkje sitje i leiligheten åleine frå klokka 16 til eg legg meg. Det går jo ikkje.

Så eg bestemte meg for å begynne med yoga. Så to-tre dagar i veka etter jobb har eg vore på yoga.

Og tru meg; eg har så godt av det! Både fordi eg føler at eg er eit menneske med ein hobby, som har eit liv utanom jobben. Og fordi hjerne, hjerte og kropp har godt av det. Eg er veldig anspent. Eg er stiv som ein stokk. Eg har store problem med å konsentrere meg om ein ting av gangen. Eg treng å tvinge hjerna mi til å kople ut. Det er eg i ferd med å klare.

Så på ein måte har tida på jobb i juli vore avslappande og fin. Sjølv om du alltid må vere klar til å svare Nationen, regionaviser, Nrk radio, eller som i går; stille opp i Dagsnytt18. Eg gler meg no til å legge bort mobiltelefonen, og ha skikkeleg ferie!

Turen i ferien går til London, og så ei veke chartertur (Eg har ikkje vore i London sidan eg var speider ein gong på ungdomsskulen, så eg tek i mot London-tips med takk).

Men fyrst skal eg ut med mine herlege kollegaer i Landbruks- og matdepartementet for å ta ein "etter jobb-pils". :)


Kommentarer

Populære innlegg fra denne bloggen

Korleis få trent når du er åleine med ein 1-åring heile dagen?

Dei siste månadene har trening vore min ultimate form for åleinetid og måte å hente overskot på. Anten det har vore i form av å springe ut ein kort tur, gjere nokre øvingar med kettlebell'n på gardsplassen eller stikke på treningsrommet i Heggenes. I Oslo har eg meldt meg inn hjå Sats Elixia, og eg har funne ut at eg verkeleg elskar å vere med på gruppetrening (som eg ikkje skjønner kvifor eg ikkje gjorde før når eg hadde masse tid?), og for ikkje å prate om dampbad eller badstue etterpå. Eller ein laaang dusj!


Den veka her er eg imidlertid åleine med Sigmund i Oslo for å ha vakt på jobben. Sidan eg blir sur og lei om eg ikkje får trent og får den åleinetida, var min store bekymring for korleis dette skulle gå denne veka. Korleis får dei som har eineomsorg for ungar eigentleg trent?


Eg har barnepass inkludert i Sats-medlemskapet mitt, men eg har ikkje hatt hjarte til å plassere han der den veka her, sidan eg har vore oppteken av at dette også skal bli "Hanne og Sigmund sin dr…

Too good to go

Denne veka har eg med Sigmund (snart 1 år) på jobb i Oslo. Slik må det nesten bli når eg har vakt, men ikkje barnevakt. Sigmund storkosar seg med å klatre opp trappa til kommunikasjonsavdelinga, mens eg spring etter. I dag fekk eg lese nokre aviser mens Sigmund såg på Pudding-tv.

Poenget er at det er svært lite å få gjort av jobbting før etter Sigmund har lagt seg klokka 18. Difor tenkte eg at eg skulle gjere halvveis jobbrelaterte ting som er mogleg å kombinere med å underhalde ein svært aktiv liten krabat. I dag bestemte eg meg difor for å teste appen "Too good to go". For de som ikkje veit kva dette er, så er det altså ein teneste som formidlar kontakt til bakeri, restauranter og hotell, der du kan få kjøpt overskotsmat til ein billig penge. Anten frå det som er att i bakeriutsalet eller som er att etter hotellfrukosten.

Fyrste tips; ver tidleg på om morgonen. "Pakkene" blir fort utseld (spesielt hjå bakeria), så du bør legge inn bestillinga di tidleg om morgo…

Vurdering av årets finale i Melodi Grand Prix

Seinare enn det brukar, men finalen i årets MGP kom likevel brått på. Fire timar på buss laurdagsformiddag gjev meg likevel tid til å trille terning. Her er poenga frå Hanne-juryen i år.

Aleksander Walmann - Talk to the hand Med fare for å virke som ei gammal sur dame, er dette slik nymotens musikk eg ikkje skjønner meg på. Dette er så flatt og så kjedeleg. Mambojambo er kanskje kult å synge for kidza, men ikkje for meg. 
Terningkast: 2 

Charla K - Stop the music Dette er fint. Faktisk kjempefint dess meir du høyrer på songen. Og det verkar så proft og så gjennomført! I MGP likar eg vanlegvis glitter og mas, men dette må då vere kveldens favoritt?
Terningkast: 5 
Alejandro Fuentes - Tengo Otra Eg digger jo latino og denne songen er ein sang som hadde vore på spelelista mi når eg jogger, men utan at eg ville gjeve songen så mykje oppmerksemd. Det er halvpent, men ikkje så mykje meir enn det. 
Terningkast: 3
Ida Maria - Scandilove Hurra! Endeleg ein song som får meg i godt humør. Ved fy…