Gå til hovedinnhold

Nytt hus, ny sjef og ny giv

Mange nye ting har skjedd sidan eg oppdaterte blogg sist.

Nytt hus
Eg og Trond har kjøpt oss hus. Det har tatt mykje tid. Vi trudde det skulle ta maks ei veke å måle stova kvit. Det tok over tre veker. 

Vesle julaften fekk vi omsider 15 minutt til å finne juletre. Frå vår eigen skog. Vi har ein svær skog på eitt mål omlag, og der har vi jo nokre fantastiske juletre. Effektivt er det i alle fall!


På julaften var vi endeleg ferdig med stova, og klare til å kople ut. Resten av jula satt vi i kvar vår nye fantastiske lenestol og høyrte på radio.



Ny sjef
I desember fekk eg også ny sjef. Og opplevde å bli veteranen i eit departement. I alle fall blant politisk leiing. Eg gjekk frå å vere yngst i politisk leiing til å bli eldst. Men elles har det vore supert å få ny sjef (eg gråt riktignok nokre sure tårer sliten og trøtt før jul når eg følte meg gamal og sliten). 

Eg har også opplevd å få avskjed i nåde i Statsråd for så å bli utnevnt som statssekretær rett etterpå (det går heilt fint, og eg kunne sitte på kontoret mitt heile tida - eg måtte ikkje gå ut). 

Eg har ikkje bilete av meg og ny sjef (okey - eg skal få ordna det berre for bloggen sin skuld). Men eg har eit bilete av pepperkakekunst laga av avdeling for skog- og ressurspolitikk her i Landbruks- og matdepartementet. Det synleggjer kor glad eg er for at eg skal fortsette å jobbe med denne fine gjengen som er her og som imponerer meg kvar einaste dag. Og som du sjølvsagt blir glad i etter over to år blant landbrukets fremste byråkratar. 

De ser det kanskje berre så vidt, men dette er Svalbard globale frøhvelv lagd som pepperkake. Eitt av tre pepperkakebidrag til jul frå embetsfolk her i Landbruks- og matdepartementet (LMD). Noregs kulaste byråkrater finst her i LMD - ingen tvil om det!


Ny giv
Eg er litt usikker på om eg kan si det blir ny giv, men eg føler meg til tider ganske motivert. Sjølv om eg er usikker på om eg nokon gong kjem til å måle tak og veggar meir i heile verda. 

Det beste med å kome heim i helga bortsett frå å treffe Trond, høyre på radio, drikke kaffi og slappe av i vårt eige hus, er å gå lange turar i flott vinterlandskap i Heggenes. 


Det finst ikkje kaldt vêr - berre dårlege unnskuldningar. Har her gått ei mil til fots i -15 grader og innser at formen er for dårleg sidan eg må ligge i fosterstilling på stovegolvet då eg kom heim att (ps: eg er også overtydd om at eg eigentleg er penare enn dette i verkelegheita).


Det er for fint ute til å sitte inne. Og sjølv om det ikkje vart småbruk på oss denne gongen, kan vi nyte synet av landbruk og dyr i nærleiken av oss. Samtidig som vi slepp arbeidet. Det er jo litt greitt det også. 


Ny giv gjeld også denne bloggen. I morgon reiser eg til Amsterdam på ministerkonferanse om antibiotikaresistens. Eg lover bloggpost om det. Og så lover eg ein privat post til helga med bilete frå huset for den som er nysgjerrige på kor rotete eg eigentleg er (eg har forresten også begynt å bake brød kvar gong eg er heime i helgene - det fortener også kanskje ein eigen bloggpost). 

Kommentarer

Populære innlegg fra denne bloggen

Korleis få trent når du er åleine med ein 1-åring heile dagen?

Dei siste månadene har trening vore min ultimate form for åleinetid og måte å hente overskot på. Anten det har vore i form av å springe ut ein kort tur, gjere nokre øvingar med kettlebell'n på gardsplassen eller stikke på treningsrommet i Heggenes. I Oslo har eg meldt meg inn hjå Sats Elixia, og eg har funne ut at eg verkeleg elskar å vere med på gruppetrening (som eg ikkje skjønner kvifor eg ikkje gjorde før når eg hadde masse tid?), og for ikkje å prate om dampbad eller badstue etterpå. Eller ein laaang dusj!


Den veka her er eg imidlertid åleine med Sigmund i Oslo for å ha vakt på jobben. Sidan eg blir sur og lei om eg ikkje får trent og får den åleinetida, var min store bekymring for korleis dette skulle gå denne veka. Korleis får dei som har eineomsorg for ungar eigentleg trent?


Eg har barnepass inkludert i Sats-medlemskapet mitt, men eg har ikkje hatt hjarte til å plassere han der den veka her, sidan eg har vore oppteken av at dette også skal bli "Hanne og Sigmund sin dr…

Too good to go

Denne veka har eg med Sigmund (snart 1 år) på jobb i Oslo. Slik må det nesten bli når eg har vakt, men ikkje barnevakt. Sigmund storkosar seg med å klatre opp trappa til kommunikasjonsavdelinga, mens eg spring etter. I dag fekk eg lese nokre aviser mens Sigmund såg på Pudding-tv.

Poenget er at det er svært lite å få gjort av jobbting før etter Sigmund har lagt seg klokka 18. Difor tenkte eg at eg skulle gjere halvveis jobbrelaterte ting som er mogleg å kombinere med å underhalde ein svært aktiv liten krabat. I dag bestemte eg meg difor for å teste appen "Too good to go". For de som ikkje veit kva dette er, så er det altså ein teneste som formidlar kontakt til bakeri, restauranter og hotell, der du kan få kjøpt overskotsmat til ein billig penge. Anten frå det som er att i bakeriutsalet eller som er att etter hotellfrukosten.

Fyrste tips; ver tidleg på om morgonen. "Pakkene" blir fort utseld (spesielt hjå bakeria), så du bør legge inn bestillinga di tidleg om morgo…

Vurdering av årets finale i Melodi Grand Prix

Seinare enn det brukar, men finalen i årets MGP kom likevel brått på. Fire timar på buss laurdagsformiddag gjev meg likevel tid til å trille terning. Her er poenga frå Hanne-juryen i år.

Aleksander Walmann - Talk to the hand Med fare for å virke som ei gammal sur dame, er dette slik nymotens musikk eg ikkje skjønner meg på. Dette er så flatt og så kjedeleg. Mambojambo er kanskje kult å synge for kidza, men ikkje for meg. 
Terningkast: 2 

Charla K - Stop the music Dette er fint. Faktisk kjempefint dess meir du høyrer på songen. Og det verkar så proft og så gjennomført! I MGP likar eg vanlegvis glitter og mas, men dette må då vere kveldens favoritt?
Terningkast: 5 
Alejandro Fuentes - Tengo Otra Eg digger jo latino og denne songen er ein sang som hadde vore på spelelista mi når eg jogger, men utan at eg ville gjeve songen så mykje oppmerksemd. Det er halvpent, men ikkje så mykje meir enn det. 
Terningkast: 3
Ida Maria - Scandilove Hurra! Endeleg ein song som får meg i godt humør. Ved fy…